Badan-E-Yar Ki Bu-Bas Uda Lae Hawa

badan-e-yar ki bu-bas uda laae hava

jaan aae jo vahan ho ke yahan aae hava

badan-e-yar ko bas chhu ke na itrae hava

itr ki ban ke lipat mujh se lipat jaae hava

un ke kuche men ghubar apna uda kar le jaae

mujh pe ehsan kare mere bhi kaam aae hava

ho hava-dar savari ka mire dosh-e-saba

na-tavan vo huun ki us tak mujhe pahunchae hava

bandh gai baagh men teri to hava bad-e-saba

un ke kuche men miri aah ki bandh jaae hava

ik nigah bad-e-havai bhi tumhari hai sitam

jaan is tir-e-havai se na ho jaae hava

kyuun na ho bad-e-bahari mujhe ye farmaish

kyuun na bandhun main hava yaar jo bandhvae hava

kitni nazuk vo pari hai ki hava-dar us ka

surat-e-takht-e-sulaiman raha bala-e-hava

tu mile ‘mehr’ se iima yahi tarikh ho sach

gulshan-o-bada-o-gul men tujhe garmae hava

Leave a Comment