Kamal Jafari
gul-o-saman ki tarah dil men hans rahe hain ham
ye aur baat ba-zahir bujhe bujhe hain ham
koi bhi vahima gumrah kar nahin sakta
tire ḳhayal ki zanjir men bandhe hain ham
kabhi to uljha kiye kaise kaise logon se
kabhi to aise hua ḳhud se laḌ paḌe hain ham
nigar-ḳhane men tasvir-e-ḳhasta-tar ki tarah
kisi ke samne kab se saje hue hain ham
kiye hain auron pe tanqid-o-tabsare lekin
ḳhud apna ja.eza ab tak na le sake hain ham
hamesha aap ko samjha ki aap apne hain
hamesha aap ne samjha ki dusre hain ham
‘kamal’ ham se ḳhushamad kisi ki ho na saki
is e’tibar se mash.hur sar-phire hain ham
Leave a Reply