ishq men jis ke ye ahval bana rakkha hai
ab vahi kahta hai is vaz.a men kya rakkha hai
le chale ho mujhe is bazm men yaaro lekin
kuchh mira haal bhi pahle se suna rakkha hai
hal-e-dil kaun suna.e use fursat kis ko
sab ko is aankh ne baton men laga rakkha hai
dil bura tha ki bhala kaam vafa ke aaya
yaar jaane bhi de is bahas men kya rakkha hai
ai saba aa ki dikha.en tujhe vo gul jis ne
baton hi baton men gulzar khila rakkha hai
dekh ai dil na kahin baat ye us tak pahunche
chashm-e-namnak ne tufan uTha rakkha hai
husn chahe jise hans bol ke apna kar le
dil ne apnon ko bhi begana bana rakkha hai
dil jo is bazm men aata hai to jaata hi nahin
ek din dekhna divana hua rakkha hai
haal mat puchh mohabbat ka hava hai kuchh aur
la ke kis ne ye sar-e-rah diya rakkha hai
intizam aisa ki ghaTti hi nahin raunaq-e-bazm
ham se kitne hain ki vaade pe laga rakkha hai
hosh to pahle hi kho aa.e the us mahfil men
ab agar jaa.en to phir dil bhi gaya rakkha hai
tere aane ki ḳhabar pa ke abhi se dil ne
shikve ko aur kisi din pe uTha rakkha hai
bar-ha yuun bhi hua teri mohabbat ki qasam
jaan kar ham ne tujhe ḳhud se ḳhafa rakkha hai
dasht o dar ḳhair mana.en ki abhi vahshat men
ishq ne pahla qadam nam-e-ḳhuda rakkha hai
hijr men ranj bhi karte hain pe itna bhi salim
yaar tu ne to ajab haal bana rakkha hai
Leave a Reply