Ulfat Batalvi
main janta huun ki saare bure nahin hote
magar ye sach hai ki sab ek se nahin hote
mire paron men agar hausle nahin hote
ye asman mere aage jhuke nahin hote
mire sanam jo mujhe tum mile nahin hote
sukun-e-dil se mire rabte nahin hote
zamin paani hava dekh bhala sab kuchh hai
na jaane kyon mere buuTe hare nahin hote
ye tera qad hai jo rakhta hai ahmiyat varna
ḳhush-amdid ko saare jhuke nahin hote
adalaton se juḌe saare davedaron men
ye chughliyan hain sahi faisle nahin hote
jo ho sake to zaban ko zara saral rakhna
bahut se neta ziyada paḌhe nahin hote
mire ḳhuda ki inayat agar nahin hoti
mire charagh hava men jale nahin hote
tamam umr ka.i log chhoTe rahte hain
bulandiyon pe bhi ja kar baḌe nahin hote
Leave a Reply