Har Ek Ye Kahta Hai Ab Kar-E-Din To Kuchh Bhi Nahin

har ik ye kahta hai ab kar-e-din to kuchh bhi nahin

ye sach bhi hai ki maza be-yaqin to kuchh bhi nahin

tamam umr yahan khaak uda ke dekh liya

ab asaman ko dekhun zamin to kuchh bhi nahin

miri nazar men to bas hai unhin se raunaq-e-bazm

vahi nahin hain jo ai ham-nashin to kuchh bhi nahin

haram men mujh ko nazar aae sirf zahid-e-khushk

makan khuub hai lekin makin to kuchh bhi nahin

tire labon se hai albatta ik halavat-e-zist

nabat-e-qand-e-shakar angbin to kuchh bhi nahin

dimagh ab to mison ka hai charkh-e-charum par

badha diya miri khvahish ne thiin to kuchh bhi nahin

ba-qaul-e-hazrat-e-‘mahshar’ kalam shaer ka

pasand aae to sab kuchh nahin to kuchh bhi nahin

vo kahte hain ki tumhin ho jo kuchh ho ai ‘akbar’

ham apne dil men hain kahte hamin to kuchh bhi nahin

Leave a Comment