Rishi Patialvi
aarzu jurm hai mudda.a jurm hai
us faza men ummid-e-vafa jurm hai
har taraf hain mohabbat ki majburiyan
ibtida jurm hai intiha jurm hai
zauq-e-didar par laakh pabandiyan
dekh kar phir unhen dekhna jurm hai
zindagi-bhar ki ninden uchaT ja.engi
saya-e-zulf men baiThna jurm hai
har saza ko kisi ki ata maniye
ye bhi kyuun puchhiye kaun sa jurm hai
aankh uTha kar unhen dekhiye kis tarah
sar uThane ka bhi hausla jurm hai
un ke jalvon ka jab samna ho gaya
phir kisi aur ka samna jurm hai
ḳhamushi bhi saliqa hai fariyad ka
un ke jaur-o-sitam par gila jurm hai
aise mahaul men aa ga.e ham jahan
apne mahaul ka ja.eza jurm hai
maslak-e-ishq hai pairvi-e-vafa
hikmat-o-maslihat sochna jurm hai
agahi shart hai gumrahi ke liye
gumrahi par pata puchhna jurm hai
dava-e-ishq hai jurm-e-avval agar
inhiraf-e-vafa dusra jurm hai
un ki shan-e-karam kah rahi hai ‘rishi’
un se ab koi bhi iltija jurm hai
Leave a Reply