Waheed Akhtar
kahin shunava.i nahin husn ki mahfil ke ḳhilaf
gul na kyuun hanste rahen shor-e-anadil ke ḳhilaf
jan-o-iman bhi vahi dushman-e-jan-o-iman
ham gavahi bhi na denge kahin qatil ke ḳhilaf
kisi jaade pe chalo chhoḌegi tanha.i na saath
qadam uTThen to kidhar ishq ki manzil ke ḳhilaf
bazm-e-yaran ho ki mai naghma ke faizan-e-suḳhan
sab hain sazish men sharik us ki mire dil ke ḳhilaf
hijr men ji ke bahalne ke the jitne hiile
vahshat ik saath rahi ho ga.e sab mil ke ḳhilaf
isi aghosh men dam toḌengi aa kar maujen
bhagti phirti hain bekar hi sahil ke ḳhilaf
aql-e-duniya ka tumhen da.ava hai be-vaj.h ‘vahid’
do-qadam chal nahin sakte kabhi tum dil ke ḳhilaf
Leave a Reply