Poet
boliye karta huun minnat aap ki
kyuun mukaddar hai tabiat aap ki
phunke deti hai kaleja siine men
shoala ban ban kar mohabbat aap ki
itni be-parvaiyan achchhi nahin
log karte hain shikayat aap ki
chandni munh par na padne dijiye
maili ho jaegi rangat aap ki
ek dil rakhte the vo bhi kho chuke
ho gae muflis badaulat aap ki
daagh ham ko khaal sahab ko mila
ye nasib apna vo qismat aap ki
mar ke phir zinda hue samjhenge ham
jhel jaenge jo furqat aap ki
munh laga kar phir na hargiz puchhna
vaah kya achchhi hai aadat aap ki
huren jannat se to pariyan qaaf se
dekhne aati hain surat aap ki
meri surat se agar nafrat nahin
kyuun badal jaati hai rangat aap ki
ek bose par hazaron hujjaten
maniye kyuun kar sakhavat aap ki
sun ke matlab saaf ankhen pher liin
dekh li ham ne muravvat aap ki
phuul ki ja pankhudi ai bagh-e-husn
dagh-e-dil par hai inayat aap ki
har kisi ke samne rote ho ‘bahr’
bah gai ankhon se ghairat aap ki
Leave a Reply