Khalid Akhlaq
chhoTi chhoTi baton men ankhen bhar aati hain
ya to ham thoḌe pagal hain ya jazbati hain
sachcha jhuTa nek aur bad hain mere ta.aruf sab
ek hi jism men kitni ruhen gasht lagati hain
suna hai us talab ka paani baḌa nashila hai
suna hai us men pariyan aa kar roz nahati hain
kuchh to dard diye hain mujh ko duniya valon ne
lekin kuchh aise gham hain jo mere zaati hain
is bartan ka maila paani amrit jaisa hai
is men nannhi chiḌiyan aa kar pyaas bujhati hain
aa pahuncha huun tanha.i ke aise jangal men
jis men ḳhud apni avazen lauT ke aati hain
chiḳhti rahti hain ḳhamoshi mere honTon par
jis tarah sahil par lahren shor machati hain
shahr men aa kar bhi ham apni miTTi kab bhule
faḳhr hamen hai ai ‘ḳhalid’ ke ham dehati hain
Leave a Reply