mire hisar se bahar bula raha hai mujhe
koi hasin sa manzar bula raha hai mujhe
jahan muqim tha main ek ajnabi ki tarah
vahi makan ab aksar bula raha hai mujhe
jo thak ke baiTh gaya huun main biich raste men
to ab vo miil ka patthar bula raha hai mujhe
hua hai tishna-labi se muahida mera
abas hi roz samundar bula raha hai mujhe
bujha diye hain usi ne ka.i charagh mire
jo ek sham.a jala kar bula raha hai mujhe
vo janta hai main us ke sitam ka ḳhugar huun
so baar baar sitamgar bula raha hai mujhe
bula raha hai to khul kar kabhi bula.e vo
bas ik ishare se aksar bula raha hai mujhe
dayar-e-ghair men rahta huun main magar ‘alam’
har ek lamha mira ghar bula raha hai mujhe
Leave a Reply