lamha lamha kah rahi hain kuchh fazaen aag ki
zarra zarra aa rahi hain kya sadaen aag ki
khushk pedon ke labon par kya duaen hain suno
chha rahi hain har taraf dekho ghataen aag ki
kucha-o-bazar bhi divar-o-dar bhi aag hain
ik ishara sa hai faslen lahlahaen aag ki
aag ki lahren hain ya logon ki sansen hain yahan
dekhna ye bastiyan ab ban na jaaen aag ki
jism to kab ka jala ab ruuh tak jaati hai aanch
chal rahi hain tez kaisi ye havaen aag ki
ud raha hai ik bagula aag barsata hua
khetiyan sab nazr logo ho na jaaen aag ki
Leave a Reply