jab charon-or andhera tha sach kam tha jhuuT ghanera tha
dariya se baḌe ik shaḳhs ka ik dariya ke kinare Dera tha
vo tha kuchh us ke bachche the kuchh saath the aur kuchh ghar vaale
a.ine se kore dil vaale kohsar se unche sar vaale
ye log vafa ke haami the na-mus-o-haya ke haami the
bas ek rasul ke qaa.il bas ek ḳhuda ke haami the
is da.i-e-amn-o-mohabbat ke raste men dushman ki faujen
yuun barson phail ga.iin jaise chaḌhte dariya ki maujen
batil ke haath pe ye zulm haq valon se bai.at lete the
mehman bana kar laa.e the paani bhi na piine dete the
insaf ki pyaar ki ashti ki sab baten jab be-kar ga.iin
vo mard-e-mujahid haq ke liye kaT marne ko tayyar hua
afrad pe bhi aqvam pe bhi ye mushkil aati rahti hai
har daur men haq-o-batil ki quvvat Takrati rahti hai
phir jang hui vo jang jise ta-hashr na bhulega koi
vo zulm hue jin par ab tak har shahr men matam hote hain
us zulm ka qissa lamba hai us jang ki pustak bhari hai
vo jang jo kab ki ḳhatm hui vo jang abhi tak jaari hai
Leave a Reply