Shifa Gwaliari
vo pahle soch len khilti hui kali kya hai
jo sochte hain ki tarkib-e-zindagi kya hai
kidhar hai ghairat-e-gham kuchh mujhe sahara de
vo mujh se puchh rahe hain tiri ḳhushi kya hai
vafa ka raaz na samjha saka koi ab tak
ki us ki kya hai haqiqat ye vaqa.i kya hai
yahi to hoti hai saare ruḳhon ka a.ina
koi samajh ke to dekhe ki be-ruḳhi kya hai
dam-e-aḳhir hai kis ka ḳhayal jalva-faroz
ye meri maut ki had men hayat si kya hai
daraz umr ho ai jiine vaale teri magar
jo sirf apne liye ho vo zindagi kya hai
na jaane kya ho ki meri hi raushni men shifa
ḳhudi ye soch rahi hai ki be-ḳhudi kya hai
Leave a Reply