ek main bhi huun kulah-daron ke biich
‘mir’ sahab ke parastaron ke biich
raushni aadhi idhar aadhi udhar
ik diya rakkha hai divaron ke biich
main akeli aankh tha kya dekhta
aina-khane the nazzaron ke biich
hai yaqin mujh ko ki sayyare pe huun
aadmi rahte hain sayyaron ke biich
kha gaya insan ko ashob-e-maash
aa gae hain shahr bazaron ke biich
main faqir ibn-e-faqir ibn-e-faqir
aur askandar huun sardaron ke biich
apni virani ke gauhar rolta
raqs men huun aur bazaron ke biich
koi us kafir ko us lamhe sune
guftugu karta hai jab yaron ke biich
ahl-e-dil ke darmiyan the ‘mir’ tum
ab sukhan hai shoabada-karon ke biich
aankh vaale ko nazar aae ‘alim’
ik mohammad-mustafa saron ke biich
Leave a Reply