Mahshar Mein Chalte Chalte Karunga Ada Namaz

mahshar men chalte chalte karunga ada namaz

padh lunga pul-sirat pe ‘mail’ qaza namaz

sar jaae umr bhar ki ho yarab ada namaz

aae miri qaza to padhun main qaza namaz

mangi najat hijr se to maut aa gai

roze gale pade jo chhudane gaya namaz

dekho ki phans na jaaen farishte bhi jaal men

kyuun padh rahe ho khol ke zulf-e-rasa namaz

har ik sutun khana-e-shar-e-sharif hai

roza ho ya zakat ho ya haj ho ya namaz

ye kyuun khamida hai sifat-e-sahab-e-ruku

kya padh rahi hai dosh pe zulf-e-dota namaz

niyyat jo bandh li to chala main huzur men

rahbar miri namaz miri rahnuma namaz

saaqi qayam se ye jo aaya rukua men

shisha khuda ke khauf se padhta hai kya namaz

uth uth ke baith baith ke karta hai kyuun ghurur

zahid kahin badhae na teri riya namaz

arkan yaad hain mujhe ai davar-e-jaza

gar hukm ho to samne padh luun qaza namaz

shaitan ban gaya hai farishta ghurur se

kya faeda hua jo padhi ja-ba-ja namaz

le jaate hain mujhe su-e-dozakh kashan kashan

roze mire idhar hain udhar hai qaza namaz

haqq-ul-yaqin ka naam uruj-e-maqam hai

padhte hain auliya sar-e-dosh-e-hava namaz

masjid men panch vaqt dua vo bhi vasl ki

‘mail’ buton ke vaste padhte ho kya namaz

Leave a Comment