Reg-Zar-E-Hayat Se Guzre

Shams Fareedi

reg-zar-e-hayat se guzre

har qadam hadsat se guzre

ḳhar-o-ḳhashak ka ghubar liye

gulshan-e-ka.enat se guzre

tujh ko paane ki justuju yarab

ham had-e-ka.enat se guzre

sab ko hai da.ava-e-hama-dani

kitne irfan-e-zat se guzre

tere ghar ka tavaf karte hue

alam-e-shash-jihat se guzre

arsh hilne laga tha al-e-rasul

tishna-lab jab furat se guzre

shams’ afaq ke safar men ham

nau-ba-nau hadsat se guzre