chehra hua main aur miri tasvir hue sab
main lafz hua mujh men hi zanjir hue sab
buniyad bhi meri dar-o-divar bhi mere
ta.amir hua main ki ye ta.amir hue sab
vaise hi likhoge to mira naam bhi hoga
jo lafz likhe vo miri jagir hue sab
marte hain magar maut se pahle nahin marte
ye vaqi.a aisa hai ki dil-gir hue sab
vo ahl-e-qalam saya-e-rahmat ki tarah the
ham itne ghaTe apni hi ta.azir hue sab
us lafz ki manind jo khulta hi chala jaa.e
ye zat-o-zaman mujh se hi tahrir hue sab
itna suḳhan-e-‘mir’ nahin sahl ḳhuda ḳhair
naqqad bhi ab mo’taqid-e-‘mir’ hue sab
Leave a Reply