Roohi Kanjahi
is shola-ḳhu ki tarah bigaḌta nahin koi
tezi se itni aag pakaḌta nahin koi
vo chehra to chaman hai magar saneha ye hai
us shaḳh-e-lab se phuul hi jhaḌta nahin koi
ḳhud ko baḌha-chaḌha ke batate hain yaar log
halanki is se farq to paḌta nahin koi
logon ka kya hai aaj mile kal bichhaḌ ga.e
gham do ghaḌi bhi mujh se bichhaḌta nahin koi
majburi-e-hayat hai varna zamin par
ḳhush ho ke eḌiyan to ragaḌta nahin koi
jis tarah yaad chhoḌ gaya mere dil men tu
is umdagi se la.al bhi juḌta nahin koi
kahte hain log dekh ke is haal men mujhe
apne ḳhilaf jang to laḌta nahin koi
‘ruhi’ tujhe bhi laag rahi hai zamane se
be-vaj.h to kisi se bigaḌta nahin koi
Leave a Reply