Ahmad Ali Barqi Azmi
us ne kiya hai vada-e-farda aane do us ko aae to
naam badal dena phir mera laut ke vapas jaae to
arz-e-tamanna karenge us se agar na vo thukrae to
us se zarur milenge ja kar pahle hamen bulae to
izzat-e-nafs ka hai ye taqaza husn-e-suluk karen donon
us ko ham labbaik kahenge rasm-e-vafa nibhae to
saf.ha-e-zehn pe naqsh hai us ka mere abhi tak naz-o-niyaz
jaise sharmata tha pahle vaise hi sharmae to
ruthne aur manane ke ehsas men hai ik kaif-o-surur
main ne hamesha use manaya vo bhi mujhe manae to
kyuun rahta hai mujh se bad-zan hai jo mira manzur-e-nazar
kuchh nahin aata meri samajh men koi mujhe samjhae to
khun-e-jigar se sinchunga gulzar-e-tamanna us ke liye
bagh-e-hayat men gul-e-mohabbat aa kar mire khilae to
fasl-e-khizan men kya hoga asar numayan hain jis ke
fasl-e-bahar men ‘barqi’ apne dil ki kali murjhae to
Leave a Reply