shiddat-e-zat ne ye haal banaya apna
jism-e-majnun men hua tang shaloka apna
yaar banta nahin vo nuur ka putla apna
khaak men mil gaya taskhir ka daava apna
mai-kashon men na koi mujh sa namazi hoga
dar-e-mai-khana pe bichhta hai musalla apna
vasl ki raat bahut tuul hua akhir-kar
mukhtasar ye hai ki faisal hua qissa apna
gul khila kar abhi bulbul ko jalaun kya kya
vo inayat karen gar por ka chhalla apna
rabbi-areni ki sada ho bhi to but bol uthen
aap dikhlaen agar dair men jalva apna
aina-khana men chal baithiye do-char ghadi
dekhna hove jo manzur tamasha apna
jite-ji khvesh-o-aqarib the pas-e-marg afsos
khaak men daab diya koi na samjha apna
kisi sayyad ki pad jaae na chidiya pe nazar
aap sarkaen na mahram se dupatta apna
aap sau baar ukhad jaaen nahin kuchh parva
jam gaya ek pari-zad se naqsha apna
dam-e-mahram men phansaya hai khuda khair kare
ashiyana na bana baithe ye chidiya apna
garm-khvabi ne tiri zabh kiya ai qatil
ek dam bhi na kaleja hua thanda apna
rind-mashrab hain kisi se hamen kuchh kaam nahin
dair apna hai na kaaba na kalisa apna
hai vahi sar vahi sauda vahi josh-e-vahshat
vasl tabdil hui rang na badla apna
un ki zulfon ko ye daava hai ki ham kaale hain
ham ne bachte nahin dekha kabhi maara apna
ghair se rakhiye na imdad ki ummid ‘agha’
kaam aata hai miri jaan bharosa apna
Leave a Reply