tere milne ka aḳhiri imkan
jaise mujh men hai ek naḳhlistan
ghar men lagta nahin hai ji mera
dasht men rah gaya mira saman
ret men sipiyan mili hain mujhe
kya samundar tha pahle registan
lauTe shayad isi bahane vo
rakh liya main ne us ka kuchh saman
tu tire ird-gird hi hai kahin
har taraf DhunDh har jagah ko chhan
duur tak koi bhi nahin dil men
aḳhiri shahr bhi mila viran
kis ne phunki hai jism men sansen
kis ne chheḌi hai zindagi ki taan
ḳhaak ho ja.ega badan ‘atish’
honge ik din dhuan ye jism o jaan
Leave a Reply