kabhi shakh o sabza o barg par kabhi ghuncha o gul o khaar par
main chaman men chahe jahan rahun mira haq hai fasl-e-bahar par
mujhe den na ghaiz men dhamkiyan giren laakh baar ye bijliyan
miri saltanat ye hi ashiyan miri milkiyat ye hi chaar par
jinhen kahiye ishq ki vusaten jo hain khaas husn ki azmaten
ye usi ke qalb se puchhiye jise fakhr ho gham-e-yar par
mire ashk-e-khun ki bahar hai ki muraqqa-e-gham-e-yar hai
miri shairi bhi nisar hai miri chashm-e-sehr-nigar par
ajab inqilab-e-zamana hai mira mukhtasar sa fasana hai
yahi ab jo baar hai dosh par yahi sar tha zanu-e-yar par
ye kamal-e-ishq ki sazishen ye jamal-e-husn ki nazishen
ye inayaten ye navazishen miri ek musht-e-ghubar par
miri samt se use ai saba ye payam-e-akhir-e-gham suna
abhi dekhna ho to dekh ja ki khizan hai apni bahar par
ye fareb-e-jalva hai sar-ba-sar mujhe dar ye hai dil-e-be-khabar
kahin jam na jaae tiri nazar inhin chand naqsh o nigar par
main rahin-e-dard sahi magar mujhe aur chahiye kya ‘jigar’
gham-e-yar hai mira shefta main farefta gham-e-yar par
Leave a Reply