nasir-kazmi

Dard Kam Hone Laga Aao Ki Kuchh Raat Kate

dard kam hone laga aao ki kuchh raat kate

gham ki miad badha jaao ki kuchh raat kate

hijr men ah-o-buka rasm-e-kohan hai lekin

aaj ye rasm hi doharao ki kuchh raat kate

yuun to tum raushni-e-qalb-o-nazar ho lekin

aaj vo moajiza dikhlao ki kuchh raat kate

dil dukhata hai vo mil kar bhi magar aaj ki raat

isi be-dard ko le aao ki kuchh raat kate

dam ghuta jaata hai afsurda-dili se yaaro

koi afvah hi phailao ki kuchh raat kate

main bhi be-kar huun aur tum bhi ho viran bahut

dosto aaj na ghar jaao ki kuchh raat kate

chhod aae ho sar-e-sham use kyuun ‘nasir’

use phir ghar se bala laao ki kuchh raat kate

More Poems

Leave a Comment