Poet
marhale to ziist ke tai kar liye
paanv lekin ablon se bhar liye
ghar se bahar raushni thi muntazir
kaise kaise ḳhushnuma manzar liye
aur kya dekhen ki vahshat ke sabab
phuul dekhe haath men patthar liye
dasht se ghar lauT ke pachhta.e ham
ghar bhi nikla dasht ka manzar liye
siikh duniya se takallum ka hunar
ek fiqra saikḌon nashtar liye
ab zara tum bhi ḳhuda ban kar dikhao
pattharo ham ne to sajde kar liye
naqsh hai ‘ḳhavar’ usi ka shahkar
ulTe-sidhe rang jis ne bhar liye
Leave a Reply