sahra se na jangal ki kabhi ḳhaak se uTThe
ab ke vo bagule ḳhas-o-ḳhashak se uThe
barsegi vo atish ki jhulas ja.enge dariya
ik abr agar dida-e-nam-nak se uTThe
go tu ne har ik shaḳhs ko miTTi se banaya
par sang ke paikar bhi tire chaak se uTThe
hai jin ki bulandi pe ḳhajil auj-e-surayya
kuchh aise sitare bhi miri ḳhaak se uTThe
ik habs-e-bala-ḳhez garan tha so bil-aḳhir
ham sada-sifat mahfil-e-chalak se uTThe
tujh jism ko chhune ka ye e.azaz hai janan
ḳhushbu tiri utri hui poshak se uTThe
thi jin se falak-bos pahaḌon ko girani
vo sadme bhi ‘nasir’ dil-e-ghamnak se uTThe
Leave a Reply