Poet
kaun ye raushni ko samjha.e
saath dete nahin kabhi saa.e
raaz khul jaa.e phir vo raaz kahan
baat hi kya jo lab pe aa jaa.e
ghar hamesha hi be-charagh raha
daagh siine ke lau na de paa.e
chandni khal rahi hai un ki tarah
guzre lamhat kitne yaad aa.e
tire kuche men sub.h-dam aksar
dekh kar phuul ham ko sharma.e
dhuup men mere saath chalte hain
un ki palkon ke dil-nashin saa.e
ham sukun ki talash men aḳhir
tere kuche men phir chale aa.e
roz jaata huun mai-kade ki taraf
kaash ye dil kabhi bahal jaa.e
ab ḳharabat men vo rind kahan
shab ga.e sub.h ki ḳhabar laa.e
bu-e-mai se mahak raha hai dimagh
bu-e-gul ki havas nikal jaa.e
mai-kada vaqt hi pe khulta hai
‘vajd’ be-vaqt kyuun chale aa.e
Leave a Reply