Jahangeer Nayab
kyuun zulm Dha raha huun main apne vajud par
kichaḌ uchhalta huun main apne vajud par
inkar kar ke ḳhud hi main apne vajud ka
ghussa utarta huun main apne vajud par
kya chahta huun ḳhud se mujhe ḳhud nahin pata
aur ta.an chhoḌta huun main apne vajud par
Dar hai koi chura na le mujh se kabhi mujhe
pahre laga raha huun main apne vajud par
kar ke ḳhud apne saare subuton ko mustarad
ungli uTha raha huun main apne vajud par
‘nayab’ mujh se faiz uThata hai har koi
kab dagh-e-bad-numa huun main apne vajud par
Leave a Reply