dua karo ki ye pauda sada hara hi lage
udasiyon men bhi chehra khila khila hi lage
vo sadgi na kare kuchh bhi to ada hi lage
vo bhol-pan hai ki bebaki bhi haya hi lage
ye zafrani pullover usi ka hissa hai
koi jo dusra pahne to dusra hi lage
nahin hai mere muqaddar men raushni na sahi
ye khidki kholo zara subh ki hava hi lage
ajiib shakhs hai naraz ho ke hansta hai
main chahta huun khafa ho to vo khafa hi lage
hasin to aur hain lekin koi kahan tujh sa
jo dil jalae bahut phir bhi dilruba hi lage
hazaron bhes men phirte hain raam aur rahim
koi zaruri nahin hai bhala bhala hi lage
Leave a Reply