Pirzada Qasim

Gham Se Bahal Rahe Hain Aap Aap Bahut Ajib Hain

gham se bahal rahe hain aap aap bahut ajiib hain

dard men Dhal rahe hain aap aap bahut ajiib hain

saya-e-vasl kab se hai aap ka muntazir magar

hijr men jal rahe hain aap aap bahut ajiib hain

apne khilaf faisla khud hi likha hai aap ne

haath bhi mal rahe hain aap aap bahut ajiib hain

vaqt ne aarzu ki lau der hui bujha bhi di

ab bhi pighal rahe hain aap aap bahut ajiib hain

daera-var hi to hain ishq ke raste tamam

raah badal rahe hain aap aap bahut ajiib hain

apni talash ka safar khatm bhi kijiye kabhi

khvab men chal rahe hain aap aap bahut ajiib hain

Leave a Comment