Poet
chale but-ḳhane ko ḳhuda-hafiz
tum bhi zahid kaho ḳhuda-hafiz
tere kuche se pech uTha ke chale
gesu-e-mushkbu ḳhuda-hafiz
dam-e-isa se bhi shifa na hui
lo bas ai hamdamo ḳhuda-hafiz
hai bahut zud-ranj dil mera
yaar hai tund-ḳhu ḳhuda-hafiz
us sanam ko ḳhuda kahun na kahun
hai suḳhan gu-magu ḳhuda-hafiz
dil ko but-ḳhana kar ke ka.abe chale
zahido zahido ḳhuda-hafiz
hai firangan ke gore haath men dil
jaan ka sahibo ḳhuda-hafiz
dair se misl-e-nala-e-naqus
jaate hain ai buto ḳhuda-hafiz
baat bhi ki to ye kaha shab-e-vasl
jaa.en ham tum kaho ḳhuda-hafiz
shah-e-ḳhuban ke gham men jaan chali
ai ‘vazir’ ab kaho ḳhuda-hafiz
Leave a Reply