Raees Rampuri
kam mayassar ho jo hoti hai usi ki qimat
kasrat-e-gham ne baḌha.i hai ḳhushi ki qimat
pairvi-e-dil-e-nadan ka saliqa hai jinhen
un se puchhe koi be-rah-ravi ki qimat
tum ne hanste mujhe dekha hai tumhen kya malum
karni paḌti hai ada kitni hansi ki qimat
ehtiram apna hi ḳhud jis ki nigahon men na ho
kya bhala us ki nigahon men kisi ki qimat
mujh se dhoka to hua dil ko magar mauj-e-sarab
mil ga.i mujh ko miri tishna-labi ki qimat
mere siine men chhupe zaḳhm bata.enge ‘ra.is’
main ne jo ki hai ada zinda-dili ki qimat
Leave a Reply