Zehn Par Chha Gai Maut Ki Be-Hisi Nind Aane Lagi

Jameeluddin Aali

zehn par chha ga.i maut ki be-hisi niind aane lagi

DhunDhta huun andheron men asudgi niind aane lagi

bhagte bhagte maut ke saa.e se ḳhud hi dhundla ga.e

sochte sochte zindagi zindagi niind aane lagi

hain isi ahd men so tasavvur hasin koi apna nahin

thak ga.i hai mire shauq ki sadgi niind aane lagi

ḳhatm hain roz-o-shab ki pareshaniyan aur hairaniyan

thi vo kya shai jo ab tak nahin mil saki niind aane lagi

hairat-angez rangon men lipTi hui muztarib naghmagi

aaj tak apni lai men nahin Dhal saki niind aane lagi

hauslon ka hi anjam hain tajarbe bas bhare

ashti ashti ashti ashti niind aane lagi

kya mila naghm-o-rang ke shauq se sher ke zauq se

ik chubhan ik dukhan ek vamandgi niind aane lagi