Jagdish Prakash
tumhara zikr miri dastan ban baiTha
main ek zarra tha aur asman ban baiTha
saval karte hain rah-rah ke mujh se lail-o-nahar
main apni zaat se kyuun bad-guman ban baiTha
vo jis ne mujh ko nazar bhar ke bhi nahin dekha
vo shaḳhs mere fasane ki jaan ban baiTha
ḳhayal-e-nau se ulajhta hua mira ehsas
miri ghazal ke safar ka bayan ban baiTha
main jism huun ki koi ruuh ya faqat ehsas
mira vajud ḳhud ik imtihan ban baiTha
kabhi jo us ko tasavvur men la ke dekh liya
har ik ḳhayal mira gulsitan ban baiTha
Leave a Reply