Murli Dhar Shad
dost ban kar vo dilsitan na raha
chaar din bhi to mehrban na raha
dil ke dam se tha hasraton ka hujum
ab vo salar-e-karvan na raha
kya hasinon ne zulm chhoḌ diya
dil men kyuun dard ka nishan na raha
ka.abe men dair men kalisa men
zikr us ka kahan kahan na raha
dil men mere vo chhup ke baiTh ga.e
jab koi un ka pasban na raha
mujh se gar ruuTh kar gaya koi
bevafa.i ka bhi guman na raha
aap ke zulm bhi ḳhushi se sahe
‘shad’ kis roz shadman na raha
Leave a Reply