Asad Badayuni
ye log ḳhvab bahut karbala ke dekhte hain
magar ghanim ko gardan jhuka ke dekhte hain
suna hai barf-ruten raushni se Darti hain
so ik charagh ko ham bhi jala ke dekhte hain
unhen kaho ki kabhi jangalon ki samt bhi aa.en
jo bastiyon men karishme ḳhuda ke dekhte hain
junun men koi izafa nahin hai muddat se
ghubar-e-jism bhi ab ke uḌa ke dekhte hain
ye dil hai Thahri hui jhiil ki tarah kab se
ab is men phir koi patthar gira ke dekhte hain
phir ik ḳhayal ko zanjir kar diya ham ne
phir ek naam ko dil se miTa ke dekhte hain
Leave a Reply