Salam Machhli Shahri
main to kahta huun tumhi dard ke darman ho zarur
aur vo kahte hain ki tum aaj pareshan ho zarur
chaman-e-shahr to viran tha magar is ghar men
itni nik.hat hai ki tum ek gulistan ho zarur
mujh ko dikhlao na apni ye ada-e-jalva
chalo taslim ki tum mujh men bhi pinhan ho zarur
main ki avara-tarab-kosh sharabi lekin
tum ki muḳhlis ho miri zaat pe nazan ho zarur
nazm-o-afsana likhun chup rahun ya baat karun
tum ba-har-rang magar mujh men numayan ho zarur
varna kyuun aankh men aansu huun ba-vaqt-e-dushnam
dushmano tum bhi miri ziist ke ḳhvahan ho zarur
doston men to koi tum ko na puchhega ‘salam’
azmat-e-raushni-e-bazm-e-harifan ho zarur
Leave a Reply