Mayank Awasthi
koi dastak koi Thokar nahin hai
tumhare dil men shayad dar nahin hai
use is dasht ka kya ḳhauf hoga
vo apne jism men ho kar nahin hai
miyan kuchh ruuh Daalo sha.iri men
abhi manzar men pas-manzar nahin hai
tiri dastar tujh ko Dho rahi hai
tire kandhon pe tera sar nahin hai
ise la.anat samajhiye a.inon par
kisi ke haath men patthar nahin hai
ye duniya asman men uḌ rahi hai
ye lagti hai magar be-par nahin hai
Leave a Reply