javan tha dil na tha andesha-e-sud-o-ziyan pahle
vo the kya mehrban saara jahan tha mehrban pahle
koi manzil ho himmat chahiye sar ho hi jaati hai
magar luTte hain raste men hazaron karvan pahle
vo mir-e-karvan bhi ik na ik din ho ke rahte hain
jinhon ne muddaton chhani hai ḳhak-e-karvan pahle
ḳhudi jaagi uThe parde ujagar ho ga.iin rahen
nazar kotah thi tarik tha saara jahan pahle
vahi barq-e-tajalli sham.a hai mere shabistan ki
na la sakti thi jis ki taab shaḳh-e-ashiyan pahle
huun ab bhi pa-ba-gil taham bahut parvaz ki main ne
vo ab meri zamin hai tha jo mera asman pahle
nihan thiin dar-ba-dar ki Thokaron men azmaten ‘jami’
na tha is darja aa.ali tera andaz-e-bayan pahle
Leave a Reply