bas ab tark-e-ta.alluq ke bahut pahlu nikalte hain
so ab ye tai hua hai shahr se sadhu nikalte hain
ham aa nikle ajab se ek sahra-e-mohabbat men
shikari ke ta.aqub men yahan aahu nikalte hain
ye ik manzar bahut hai umr bhar hairan rahne ko
ki miTTi ke masamon se bhi rang-o-bu nikalte hain
zamir-e-sang tujh ko tera paikar-saz aa pahuncha
abhi ankhen ubharti hain abhi aansu nikalte hain
koi nadir ḳhazina hai mire dast-e-tasarruf men
jhapaTne ko dar-o-divar se baazu nikalte hain
main apne dushmanon ka kis qadar mamnun huun ‘anvar’
ki un ke shar se kya kya ḳhair ke pahlu nikalte hain
Leave a Reply