Ek Maqtul-E-Jafa Do Zulm Ke Qabil Na Tha

Saqib Lakhnavi

ek maqtul-e-jafa do zulm ke qabil na tha

varna dil ka marna asan tha mushkil na tha

shauq-e-azadi men taḌpun us pe raazi dil na tha

varna betabi salamat chhuTna mushkil na tha

hashr men vo sar jhuka.e hain main shikva kya karun

jaane vaali jaan thi mera koi qatil na tha

ab sulaimani kise kahte hain batla de mujhe

ek aalam tha tiri muTThi men mera dil na tha

de sada ab dil magar naqsh-e-qadam ko dekh kar

aise bhi dar hain kabhi jin par koi saa.il na tha

ḳhaas vaqt-e-yad-e-gulshan aur mera chheḌna

shab ko bhi sayyad mere zab.h se ghafil na tha

sub.h-o-sham-e-gham ne daman bhar ke bheja dahr se

varna is umr-e-do-roza ka koi hasil na tha

us ki qudrat na-tavanon ko bhi deta hai uruuj

asman se sar chaḌhe naala to is qabil na tha

tere naqshe ne bhi furqat men na bahlaya mujhe

sham-e-gham jab aa.i gurdon par har kamil na tha

dekh lete do qadam chal kar ki matlab tha yahi

dar pe jo aaya tha vo bimar tha saa.il na tha

qalb-e-sozan aur hi dhoka na khana dahr men

rah gaya jo aag de kar sang tha vo dil na tha

kuchh sambhal jaata agar karvaT badal jaate miri

ye mujhe dushvar tha un ke liye mushkil na tha

Dubta tha dil shab-e-vasl aa chuki thi ta-sahar

ek tinke ka sahara bhi lab-e-sahil na tha

is dil-e-gum-gashta matlab ke sabab se dahr men

kaun sa din tha ki main avara-e-manzil na tha

ek jalti sham.a uThva di bahut achchha kiya

soḳhta-dil tha main koi raunaq-e-mahfil na tha

sham-e-gham jis men rahe barson vahan kya iid ho

vo to aa jaa.e magar ye dil hi is qabil na tha

juz fareb-e-husn aur ulfat ko ‘saqib’ kya kahun

zindagi se shai kabhi us par bhi dil maa.il na tha