Shohrat Bukhari
ik umr fasane gham-e-janan ke gaḌhe hain
taare ufuq-e-sher pe kya kya na jaḌe hain
sahra men hai jal-thal to samundar men bagule
ham vaz.a ke paband hain chup-chap paḌe hain
aa.e koi jaa.e hamen kya kaam ki ham log
khambe hain ki saḌkon ke kinare pe gaḌe hain
ḳhud par jo paḌi hai to dhaḌakta nahin dil bhi
ghairon ke liye ka.abe men ja ja ke laḌe hain
mehdi koi aa.ega badal dega muqaddar
kya janiye is aas men kis din se paḌe hain
ham kuchh bhi hon lekin hain tire paanv ki miTTi
charche tire kuchh bhi na hon phir bhi to baḌe hain
ye martaba hasil hai tiri bazm ko jin se
vo log abhi tak pas-e-divar paḌe hain
angare baraste hain agar kuchh to hai varna
is munh se sada phuul mohabbat ke jhaḌe hain
mauquf karo ham-suḳhani ‘mir’ ki ‘shohrat’
arbab-e-qalam par ye shab-o-roz kaḌe hain
Leave a Reply