toDne Gul Ko Jo Wo shoKH-E-Tarahdar Jhuka

toḌne gul ko jo vo shoḳh-e-tarahdār jhukā

un ke qadmoñ pe sar-e-bulbul-e-gulzār jhukā

dekh lī tere nashe meñ jo gulābī āñkheñ

aañkh ko sharm se le nargis-e-bīmār jhukā

us kī pā-posh kī chamkī jo dam-e-sub.h kiran

chūmne us ke qadam matla-e-anvār jhukā

daur-e-sāqī meñ mire jhukne lagā ek pe ek

jaam sāġhar pe hai sāġhar pe hai vo yaar jhukā

tum ne ‘tanvīr’ likhā aisā javāb-e-‘saudā’

jins-e-mazmūñ pe har ik ban ke ḳharīdār jhukā

Leave a Comment