man-o-tu ka hijab uThne na de ai jan-e-yakta.i
kahin aisa na ho ban ja.un ḳhud apna tamanna.i
vahi main huun vahi hai tere gham ki kar-farma.i
kabhi tanha.i men mahfil kabhi mahfil men tanha.i
ḳhalish-angez hai vo alam-e-jazb-o-gurez ab tak
tiri achchhi buri har baat yuun to mujh ko yaad aa.i
qusur-e-zarf samjhun ya sho.ur-e-lazzat-andozi
tire lutf-o-karam men tishnagi hi tishnagi paa.i
na chhoḌa daman-e-hosh-o-ḳhirad dil ne mohabbat men
saza-e-dil hisar-e-agahi ki qaid-e-tanha.i
Leave a Reply