Poet
pahle to na thi itni tab-o-tab ghazal men
kaam aa ga.i gham-ḳhvari-e-ahbab ghazal men
dil par se tire gham ka abhi abr chhaTa hai
chamka hai tiri yaad ka mahtab ghazal men
yaron ko kisi taur bhi nashsha nahin hota
jab tak ki na shamil ho mai-e-nab ghazal men
jis se ḳhalish-e-dard ka aghaz hua hai
raqsan hai vahi paikar-e-simab ghazal men
har misra-e-tar taḳhta-e-gulzar ki surat
rangon ki hai ik vadi-e-shadab ghazal men
go dard ke iz.har ki aadat to nahin thi
piina hi paḌa ham ko ye zahr-ab ghazal men
asnaf-e-suḳhan aur bhi ai dost bahut hain
rangin hai miri ziist ka har baab ghazal men
Leave a Reply