terī chāhat meñ mar ke dekhūñgā
kaam ye bhī maiñ kar ke dekhūñgā
chhīn saktā hai kaun mujh se tujhe
jaañ hathelī pe dhar ke dekhūñgā
ġhair mumkin hai chāñd ko laanā
phir bhī koshish maiñ kar ke dekhūñgā
terī āñkhoñ meñ ḳhud ko pā.ūñgā
ruḳh pe tere sañvar ke dekhūñgā
rakh ke āñkhoñ meñ hijr ko tere
phir tasavvur meñ Dar ke dekhūñgā
ban ke ‘tāhir’ maiñ pyaar kī ḳhushbū
gird tere bikhar ke dekhūñgā