Jaez Hai Us Ka Qatl Hamare Hisab Se

jaa.ez hai us kā qatl hamāre hisāb se

jis ne mohabbatoñ ko nikālā nisāb se

tanqīd kar rahe haiñ kitāb-e-hayāt par

aage na baḌh sake jo kabhī intisāb se

maiñ sāhab-e-ḳhabar bhī nazar bhī junūñ bhī thā

jab tak rahā thā merā ta.alluq kitāb se

us vaqt ek sajda baḌe kaam aa gayā

maiñ jab guzar rahā thā anā ke azaab se

ik lamhe kā firāq havā.eñ na sah sakīñ

dariyā ki sharmsār rahegā habāb se

mujh se baḌe baḌe the gunahgār us jagah

be-kār Dar rahā thā maiñ yaum-e-hisāb se

kāñToñ ke ḳhauf se bhī larazte ho tum ‘munīr’

aur ghar bhī chāhte ho sajānā gulāb se

Leave a Comment