baten hain vaizon ki azaab o savab kya
do din ki zindagi men hisab-o-kitab kya
chahi vafa-e-vada to paaya javab kya
haan kahiye to ye aap ne dekha hai khvab kya
dil men ghazab ke josh hain tauba ki khair ho
karti hai dekhiye ye shab-e-mahtab kya
ye sab sahi ki zalzala hai ta-falak magar
shokhi to apni dekh mira iztirab kya
us ne to jo likhkha so likha par ghazab ye hai
ik ek puchhta hai ki aaya javab kya
achchha guman o vahm hamare ghalat sahi
kahiye to kahti hai nigah-e-pur-hijab kya
ai ham-nashin bhala vo agar sun ke hal-e-dil
kah den ki sab ghalat hai phir is ka javab kya
karte hain log vaaiz o ‘mail’ pe taan kyuun
piita nahin jahan men koi sharab kya
Leave a Reply