bhuli baton se bhi ab dil ko lagana kaisa
raah jo chhoḌ chuke phir vahan jaana kaisa
aql aur ishq ka baham ye milana kaisa
aap pahlu men hain phir hosh men aana kaisa
tar-e-daman se ulajhti rahi uljhan meri
kaisi be-chargi daman ka baḌhana kaisa
parkhe hi jaane ka ehsan liye phirta huun
kaisi maqbuliyat aur dil men samana kaisa
dhuup hathon pe malen rang-e-hina.i dekhen
ḳhvab hi ḳhvab hain ḳhvabon ka Thikana kaisa
kanch ke TukḌe hi ankhon ki amanat Thahre
kaisi ta’biren yahan ḳhvab ka aana kaisa
ghaav ginte men hi guzri hai yahan to ‘farhat’
kya gham-e-dostan marham ka lagana kaisa
Leave a Reply