tir-e-nazar se chhid ke dil-afgar hi raha
nasur us men surat-e-sofar hi raha
duniya se hai nirali adalat hasinon ki
fariyad jis ne ki vo gunahgar hi raha
saudaiyon ki bhiid koi dam na kam hui
har vaqt ghar men yaar ke bazar hi raha
nargis jo us masih ki nazron se gir gai
achchhe na phir hue use azar hi raha
gulzar men hamesha kiye ham ne chahchahe
sayyad o baghban ko sada khaar hi raha
aai na dekhne men bhi tasvir yaar ki
aina darmiyan men divar hi raha
surme se tuur ke bhi na kuchh faeda hua
ankhon ko intizar ka azar hi raha
majnun ne mera dagh-e-jigar sar pe rakh liya
ye gul vo hai jo turra-e-dastar hi raha
kuchh bhi na mufsidon ki darandaziyan chalin
ik uns mujh se un se jo tha pyaar hi raha
bole vo meri qabr jharoke se jhank kar
ye shakhs mar ke bhi pas-e-divar hi raha
mumkin na phir hui qafas-e-gor se najat
jo is men phans gaya vo giraftar hi raha
aalam men husn-o-ishq ka afsana rah gaya
yusuf hi rah gae na kharidar hi raha
sayyad ko kabhi na musibat ne di najat
bulbul ke sabr men ye giraftar hi raha
kya jaane us gharib ko kis ki nazar hui
un ankhdiyon ka shefta bimar hi raha
tu rah gaya faqat tire saudai rah gae
yusuf rahe na misr ka bazar hi raha
rahat kisi hasin se bhi paai na ai ‘sharaf’
chaha jise vo dar-pae-azar hi raha
Leave a Reply