Poet
kyuun pareshan ai dil-e-nakam hai
zindagi majburiyon ka naam hai
kya mohabbat ka yahi paigham hai
aankh se dil tak sukut-e-sham hai
tujh se azurda dil-e-nakam hai
phir bhi tera hi labon par naam hai
bhagte duniya ke pichhe kab talak
chhoḌ kar duniya bahut aram hai
ho chukin bad-namiyan barbadiyan
ab nigah-e-naz kya paigham hai
aap aa.e aur aa kar chal diye
ruuh men ab tak vahi kohram hai
jaag uThta hai shu.ur-e-zindagi
kaise kahiye ishq jins-e-ḳham hai
kuchh mohabbat aur kuchh nafrat unhen
is ta.alluq ka bhi koi naam hai
Dubte dil men mire tera ḳhayal
jhilmilata sa charagh-e-sham hai
ḳhud ḳharabi DhunDhti hai zindagi
aap par us ka ghalat ilzam hai
in dinon chup chup se rahte ho ‘shahab’
kuchh kaho to kya ḳhayal-e-ḳham hai
Leave a Reply